多點開花防不勝防日女主場勢破北韓_東方日報

亞運女足決賽，日本女足主場迎戰北韓女足。日本女足實力超班，兼有主場之利，今屆5戰全勝攻入26球未失1球，北韓女足今屆4勝1和，同樣入咗26球，但失咗2球，稍為差過日本少少；正所謂高手過招，些微差距足以定勝負。最值得留意係近4次交手中，日本女足錄得3勝1和佳績，格食格之下睇好日本女足全勝奪金，捧主勝。文:邪神

（HOY 76周五晚上6時30分直播）

日本女足攻力強勁，喺經驗豐富嘅隊長成宮唯帶領下，中前場球員都有突出表現。今屆26個入球中，前鋒神谷千菜個入獨取7球，而且連續5場都有「士哥」，最重要係上場4強對南韓女足，就係由佢梅開二度，協助日本女足贏2比0晉級；入波第2多係中場寶田沙織，佢喺分組賽首仗對泰國女足連中三元，協助日本女足大勝8比0，為球隊打響頭炮，除咗呢對入球雙保險，日本女足仲有多達9位球員有入球進帳，進攻多點開花，令對手防不勝防。

近4交鋒日本贏3次
反觀北韓女足講求整體踢法，並無進攻重心，今屆入波最多係中場全龍鐘，在分組賽階段攻入4球，淘汰賽階段並無建樹，其次係前鋒金景英、中場崔金玉同蔡恩勇，各入3球。再睇雙方近4次對賽，日本女足獲3勝1和，擺明格食格，今仗贏波攞金牌屬意料中事。